प्रिय पुणेकरांनो,

नमस्कार, मी संग्राम खोपडे. गेल्या २२ वर्षांपासून मी रेडिओच्या माध्यमातून तुमच्यापर्यंत रोज पोहोचतो आहे. इतकी वर्षे सामाजिक-सांस्कृतिक क्षेत्रामध्ये काम केल्यावर समाजाच्या मनामध्ये काय दडलंय आणि ते कसं मूर्त रूपात आणता येईल याचा चपखल अंदाज मला आहे, हे मी आत्मविश्वासाने सांगू शकतो. गेली १० वर्षे मी माझं पुणे शहर सतत बकाल होताना पाहतो आहे. मागच्या वर्षभरात तर मी झपाटल्याप्रमाणे अगदी सफाई कर्मचाऱ्यांपासून ते IT कंपन्यांच्या CEO पर्यंत ४५ हजार पुणेकरांसोबत बोललो. त्यांच्या समस्यांविषयी सखोल चर्चा केली, अभ्यास केला, नोट्स काढल्या, आणि अगदी एखाद्या विद्यार्थ्यासारखा सर्व इश्यूंचा गुंतवळा सोडवण्याचा प्रयत्न केला.

पुण्याच्या मानगुटीवर बसलेल्या १२ मुख्य प्रश्नांवर एक परिपूर्ण असे डॉक्युमेंट एक वर्ष भर राबून मी तयार केले. जो आपल्या सर्वांना पडलेला प्रश्न होता, तेच त्या डॉक्युमेंटचे नाव झाले: ‘MH१२ चे बारा कसे वाजले?’ त्यासोबतच या सगळ्या प्रश्नांवर उपाय म्हणून The Pune Model For Governance ची मांडणीही मी त्या डॉक्युमेंटमध्ये केली.

या दरम्यान मला एका गोष्टीची प्रखरपणे जाणीव झाली. ती म्हणजे की पुणेकर हा जगभर सगळीकडे पसरलेला आहे. अमेरिकेत, युरोपात, ऑस्ट्रेलियामध्ये नव्हेच तर जपानमध्ये सुद्धा पुणेकर आहे. भारतभर पुणेकर आहे, अगदी उत्तरपूर्वेकडे सुद्धा. पुणेकर नाही तो फक्त पुण्यात. पुण्यात आहे तो कोथरूडकर, डेक्कनकर, कॅम्पवाला, कल्याणी नगरकर, हिंजेवाडीकर, व औंधकर. एकाच्या प्रश्ना बद्दल दुसऱ्याला आत्मीयता नाही. प्रत्येकाला आपापले प्रश्न आणि आपापले जीवन इथपर्यंतच चिंता. आणि म्हणून पुण्याचे जे मुख्य प्रश्न आहेत ते सुटत नाहीत कारण हे सर्व प्रश्न एकमेकांमध्ये गुंतलेले आहेत, किंबहुना या प्रश्नांची उत्तरं एकमेकांमध्ये गुंतलेली आहेत. हा तिढा सोडवण्यासाठी या सर्व प्रश्नांकडे आणि त्यांच्या उत्तरांकडे holistically बघण्याची एक नितांत गरज आहे.

आणि ते करण्यासाठी पाहिजे आपल्यात एकता. सर्व पुणेकरांनी स्वतःला पुणेकर समजून जर या प्रश्नांकडे लक्ष केंद्रित केलं तर हे प्रश्न आपल्याला सुटणं काही फार कठीण नाही. परंतु जोपर्यंत एकता नाही तोपर्यंत आपल्याला कोणीही किंमत देणार नाही आणि आपले मुद्दे तसेच राहतील. थोडक्यात, एकता नाही म्हणून न्याय नाही आणि न्याय जर मिळवायचा असेल तर एकता ही फार महत्त्वाची. म्हणूनच: पुणे जोडो न्याय यात्रा.

मागच्या आठवड्यात तुम्ही माझ्यासोबत या यात्रेमध्ये सहभागी झालात. आपल्या समस्यांना राजकारणाच्या केंद्रस्थानी आणण्यासाठी  हा आपल्या सगळ्यांचा मिळून एक ऐतिहासिक असा प्रयत्न होता. पुणे जोडो न्याय यात्रेमध्ये सोशल मीडियाच्या माध्यमातून आपण ३० लाख लोकांपर्यंत पोहोचू शकलो. यात्रेच्या व्हिडिओजना ८ लाखांच्यावर व्ह्यूज मिळाले. त्यात ५० हजार लाईक्स आणि ३ हजारांच्यावर कमेंट्सचा प्रचंड प्रतिसाद मिळाला. हजारो लोकांनी स्वतःहून संपर्क करुन या उपक्रमासाठी स्वयंसेवक म्हणून काम करण्याची इच्छा प्रदर्शित केली.

यात्रा ही भारतीय परंपरेतील एक सुंदर संकल्पना आहे. यात्रेमध्ये प्रवास हा मुक्कामा एवढाच महत्त्वाचा असतो. यात्रेमुळे जग किती बदलेल हे सांगणं कठीण आहे, परंतु यात्रेमुळे यात्री नक्कीच बदलतो. आणि हाच बदल जगामध्ये घडवून आणण्यासाठी, आपल्या भारतीय संस्कृतीत यात्रा ही महत्त्वाची. आणि पुन्हा म्हणूनच: पुणे जोडो न्याय यात्रा.

तुमच्याबरोबर जे संवाद घडले, जे संभाषण झालं, जे प्रेम भरभरून मिळालं, आणि जे शिकायला मिळालं, त्याबद्दल मी तुमचा आणि आपल्या या सुंदर शहराचा नेहमीच ऋणी राहीन. तुमचा पाठिंबा माझ्यासाठी सगळ्यात मोलाची गोष्ट आहे.

हा आहे माझा संग्राम पुण्यासाठी, आपला संग्राम पुण्यासाठी. बोलत राहू, भेटत राहू, पुण्यासाठी काम करत राहू.

तुमचाच,
संग्राम खोपडे
पुणे लोकसभा